Ymunwch â ni!

Mae ymddiriedolwyr (a elwir hefyd yn aelodau pwyllgor rheoli, neu’n aelodau Bwrdd) yn hanfodol er mwyn cynnal mudiadau gwirfoddol. Dyma’r bobl sy’n gyfrifol am sicrhau bod gan fudiad gwirfoddol strategaeth glir, ei bod yn driw i’w weledigaeth wreiddiol, a’i bod yn cydymffurfio â’r holl reolau a dyletswyddau cyfreithiol sydd arni.

Mae dyletswydd Ymddiriedolwyr i ddarparu llywodraethu da yn dwyn nifer o gyfrifoldebau pwysig yn ei sgil. Gallech chi fod yn ymwneud yn uniongyrchol â chyflawni rhai gorchwylion, tra gellir dirprwyo eraill i’r staff a gyflogwch. Fel ymddiriedolwr, byddwch yn dal i fod yn gyfrifol am weithredoedd y staff a rhaid i chi fonitro sut y byddant yn cyflawni eu dyletswyddau. Dyma'n fras rai o gyfrifoldebau ymddiriedolwyr:

• cynllunio strategol
• atebolrwydd i gyllidwyr a rhanddeiliaid eraill (defnyddwyr y gwasanaeth, gwirfoddolwyr, staff ayb)
• monitro gwaith y mudiad
• gwerthuso gwaith y mudiad
• rheoli eiddo a thir y mudiad
• rheoli cysylltiadau cyhoeddus y mudiad
• cynrychioli barn y mudiad
• rheoli staff a gwirfoddolwyr
• goruchwylio gweithgareddau codi arian

Bydd pobl o bob cefndir yn dod yn ymddiriedolwyr i fudiadau gwirfoddol, a chyda’i gilydd, byddant yn cyfrannu oriau mawr (yn ddi-dâl) a’u hegni i amrywiaeth eang o achosion da. Gall dod yn ymddiriedolwr ddwyn manteision mawr i unigolion hefyd, a hynny ar lefel bersonol ac ar ysgol gyrfa.

I gael gwybod rhagor am gyfleoedd i ymddiriedolwyr yn eich ardal, dewiswch ardal o’r rhestr ar ein hafan, yna dewiswch "ymddiriedolwyr" o'r rhestr gategorïau.

Cylchlythyr electronig yw Newyddion ymddiriedolwyr a ddosberthir bob mis. Os hoffech chi ei dderbyn, llenwch y ffurflen ar-lein syml drwy ddilyn y ddolen hon: www.wcva.org.uk/emembership .Yma fe allwch chi hefyd danysgrifio i e-gylchlythyron cyllid a gwirfoddoli WCVA.